Faemos y esfrutamos LABoral

Somos munches les artistes, comisaries, xestores y colectivos de creadores y visitantes que dende’l 2007 fiximos parte activa y profesional, o a cencielles visitamos LABoral Centro de Arte como públicu, disfrutando de les propuestes alredor del arte y de la cultura dixital. 

LABoral Centro de Arte ye unu de los referentes nacionales y internacionales abordando les complexidaes de les práctiques artístiques actuales y funciona como estímulu pa la fusión de distintes artes dixitales, xenerando diálogu ente axentes y disciplines, non artístiques namás sinon tamién tecnolóxiques, científiques y sociales. Dende l’empiezu’l Centro xenera redes ente artistes, xestores y públicu, cuando nel ámbitu local cuando nel nacional y internacional. 

En clave asturiana, LABoral supón una vía pública y activa d’entrada y salida de conocimientu y cultura pa la comunidá autónoma, les que, por desgracia, nun abonden.

Nes selmanes últimes y como yá asocede de manera periódica dende l’empiezu, asistimos a un aumentu de comunicaos na prensa local respecto de distintos movimientos nel Centru, casu de la non renovación de los cargos directivos [ 1 ], la fuxida de los sos yá menguaos collaboradores y patronos privaos [ ] y especulaciones alredor de la programación y usos futuros [ 1 ] que distorsionen y desasitien la realidá pa la que se creó, el so desarrollu actual y el so funcionamientu. 


A esta serie d’acontecimientos y presiones de contino, xúnese la nula tresparencia y comunicación del gobiernu del Principáu como xestor principal del Centru.  

Llamentablemente, nun son fechos aisllaos y LABoral  súmase a la rellación llarga d’agravios, males decisiones y praxis polítiques que chisquen otros centros culturales de la nuestra xeografía y que, lloñe de ser valoraos y afalaos nun esperáu compromisu institucional y social, son sometíos a un acosu de contino. Esta situación asturiana resona nos casos de Medialab Prado 1 ]en Madrid, el C3A de Córdoba o’l CDAN [ 1 ] d’Uesca, ente munchos más otros.

Ye por ello qu’artistes, xestores y les ciudadanes abaxo firmantes nun podemos quedar colos brazos cruciaos énte esti nuevu revés, que compromete una vegada más, el llabor de LABoral Centro de Arte, aprobeciendo por ello ámbitos culturales y sociales, yá maltrataos. Y más nun contestu de pandemia recién y precariedá aguda, por mor de les diverses restricciones sociales y económiques de resultes de la mesma. 


En concreto, les abaxo firmantes pidimos:

  • Claridá y tresparencia total tocantes el futuru organizativu y económicu del centru, mesmo que los efectos previstos na so programación.
  • Que’l patronatu de LABoral tea formáu hasta por un 50% de profesionales del sector, que’l so conocimientu ye imprescindible pa tomar decisiones rigoroses y espertes alredor del futuru del Centru.
  • Yá que’l patronatu ta quedando ensin patronos privaos y premios/ ayudes pa la producción y muestra del texíu artísticu asturianu multidisciplinar nun van ser convocaes,  que se cuente cola asignación presupuestaria necesaria pa garantizar la continuidá de les mesmes nunes condiciones dignes y suficientes.
  • Que se respete la coherencia y llibertá artística na programación en toles llinies de desarrollu, evitando’l ceder el centru pa iniciatives que poco o nada tienen que ver col desarrollu de les sos temátiques.
  • Que se mire pola integridá física del Centru, aportando recursos técnicos y humanos suficientes, con condiciones llaborales dignes, pa que los espacios sían usables y nun sían nin abandonaos nin desdexaos.
  • Que s’establezan víes de participación directa con usuario/es del Centru y collaboradores, pa que’l diálogu sía ágil y ayude a que propuestes simples y necesaries pa la comunidá artística y la ciudadanía, puedan ser realmente escuchaes y puestes en práctica.
  • En definitiva, que se protexa y se sostenga a llargu plazu a LABoral Centro de Arte, con independencia del signu políticu de les alministraciones competentes,  ayudando a que’l centru pueda conservar la so naturaleza n’evolución constante, ensin la intromisión política o careciendo la presión de momentos políticos coyunturales. 

¡Puxa LABoral!

Firmar aquí / sign here

1,110 firmas