Carta de sofitu al llabor de Pablo de Soto como direutor de LABoral

Les ciudadanes y ciudadanos firmantes d’esta carta, amás de la comunidá artística y social vencida a LABoral Centru d’Arte, queremos amosar el nuesu sofitu al direutor cesáu, Pablo de Soto, y el nuesu refugu a la decisión inxusta tomada pol Patronatu.

Pablo de Soto amosó, a lo llargo de la so trayeutoria y especialmente nel so llabor en LABoral, un compromisu total cola creación, l’arte y la cultura n’Asturies. La so visión innovadora y la so capacidá pa fomentar el talentu llocal, estatal ya internacional traduciéronse en iniciatives qu’enriquecieron la nuesa comunidá dende munchos ámbetos, entendiendo la creación d’una manera abierta, como un conxuntu de saberes que tienen d’estar alliniaos col nuesu presente, suxetu a grandes retos.

Baxo la xestión de Pablo de Soto, non solo aumentaron esponencialmente toles cifres y métriques del Centru, sinón que se llogró que la so programación volviera ser un referente, implicando y reconstruyendo los llazos cola comunidá artística y social.

Dalguna cosa falla nel Patronatu cuando sobre les sos espaldes cunten cinco destituciones en poco más de diez años, y sicasí, nos momentos nos que’l centru cunta con mayor prestíu y vinculación per parte de la comunidá, omítense les soluciones en favor del centru y vuelve a quedase ensin direición.

Nun queremos un centru encerráu en sigo mesmu y elitista, tampoco triste y ensin recursos. Queremos un centru que faiga sonase la axitación folclórica de Rodrigo Cuevas, que fale de teunoloxía y democracia, de feminismos, d’arte y d’emergencia climática. Ye necesario que la cultura y los centros culturales sían un ágora de debate públicu.

Nun podemos permitir esta censura. Nun podemos permitir que’l Centru, agora que va bien, quede ensin cabeza con argumentos y acusaciones más que cuestionables. El Patronatu tien de reconsiderar la so decisión.